NËNSHKRUHET MARRËVESHJA E BINJAKËZIMIT MIDIS PRIZRENIT & BERATIT

Me rastin e 140 – vjetorit të Lidhjes Shqiptare të Prizrenit, me ftesë të Kryetarit të Komunës së Prizrenit, z. Mytaher Haskuka, Kryetari i Bashkisë Berat, z. Petrit Sinaj, ishte sot mysafir në ndërtesën komunale të Prizrenit (Shtëpinë e Bardhë), për të nënshkruar marrëveshjen e binjakëzimit midis dy qyteteve respektive, të cilat i bashkon entiteti, kultura dhe trashëgimia historike. Në marrëveshjen e nënshkruar parashikohet bashkëpunimi në disa fusha, si: shkëmbime kulturore, projekte të përbashkëta në fushën e turizmit, arsimit, projekte sociale dhe shkëmbime ndërmjet bizneseve. Vizita e përfaqësuesve të Bashkisë Berat, të kryesuar nga Kryebashkiaku Sinaj, përkon me 140 – vjetorin e Lidhjes së Prizrenit, që u festua dje dhe 19 – vjetorin e çlirimit të Prizrenit, që do të festohet nesër. Përfaqësuesit nga Berati gjithashtu morën pjesë në manifestimet kulturore të organizuara në respekt të dy datave të shënuara të historisë së shqiptarëve.